Semeıde jeke sektor mańynda qamys órtendi

SEMEI. QazAqparat – Semeı qalasynda Prjevalskıı kóshesiniń boıyndaǵy 3 gektar aýmaqta qamys janyp ketti, dep habarlaıdy QazAqparat Abaı oblysy TJD baspasóz qyzmetine silteme jasap.

Órt 16 qazan saǵat 18:00 shamasynda shyqqan. Eń jaqyn turǵyn úı sektory janyp jatqan qamystan 100-150 metr qashyqtyqta bolǵan.

Oqıǵa ornyna oblystyń TJD, jergilikti atqarýshy organdardyń kúsh-quraldary jiberildi.

Elýden astam órt sóndirýshi qyzyl jalynnyń jeke turǵyn úı sektoryna taralý qaýpiniń aldyn aldy, eshkim zardap shekken joq. Saǵat 20.22-de órt sóndirildi.

Aıta ketý kerek, aımaqtyń qatty batpaqtanýy, órt sóndirý tehnıkasyn tolyq qoldana almaý jáne jeldiń bolýy tilsiz jaýdy sóndirýge kedergi keltirdi, al bul órttiń ózdiginen taralý múmkindigin týdyrdy.

Alaıda, tilsiz jaýdyń oqshaýlanýyna qaramastan, osy ýaqytqa deıin órt ornynda perımetrdi qaraýyldaý jáne qaıta janýyna jol bermeý maqsatynda tehnıka men jeke quram kezekshilikte tur.