Semeıde jańa et kombınaty salynýy múmkin

SEMEI. QazAqparat - Semeıde «Eýrazııa Agro Semeı» JShS óndiristik qýaty jylyna 12 600 tonnany quraıtyn et kombınatyn ashýdy josparlap otyr, dep habarlaıdy QazAqparat Abaı oblysy ákimdiginiń baspasóz qyzmetine silteme jasap.

Baspasóz qyzmetiniń habarlaýynsha, qazirgi ýaqytta joba memlekettik saraptamadan ótkizilip jatyr. Jobaǵa sáıkes, qurylys jumystary 2024 jyly aıaqtalyp, kombınat paıdalanýǵa beriledi.

Budan bólek, bıyl Semeıde óndiristik qýaty jylyna 600 tonna daıyn ónim shyǵaratyn «Yqylas Invest» et konservi zaýytyn iske qosý josparlanǵan. 2023-2024 jyldary shıkizat tapshylyǵy máselesin sheshý maqsatynda oblysta et kombınattaryn salý jospary bekitildi.

2022 jyly oblystyń aýyl sharýashylyǵy taýaryn óndirýshiler men qaıta óńdeý kásiporyndary 91,8 myń tonna sıyr eti, 22,8 myń tonna qus eti, 64,5 mln dana jumyrtqa, 171,0 myń tonna kartop, 23,4 myń tonna sábiz, 3,9 myń tonna pııaz jáne basqa da ónim túrlerin óndirdi.

Abaı oblysynda 39 bordaqylaý alańy jumys isteıdi. Búginde jobalyq qýaty jylyna 18 myń tonna sút ónimderin óndiretin 7 sút óńdeý kásiporny bar. Oblysta 12 taýarly-sút ferma jáne 7 sút qabyldaý pýnkti jumys isteıdi.

Budan bólek, qaıta óńdeý kásiporyndaryn shıkizatpen qamtamasyz etý úshin 2023 jyly «Qalıhanuly» ShQ jáne «Órnek» JShS-i 400 basqa arnalǵan taýarly-sút fermasyn keńeıtý maqsatynda eki ınvestıtsııalyq jobany iske asyrady.

Kókpekti aýdanynda «Órnek» JShS qaıta óńdelgen ónim úlesin ulǵaıtý úshin qýaty 7 myń tonna sút óńdeý zaýytyn salýdy josparlap otyr (ınvestıtsııa somasy 500 mln teńge).