Semeıde jalaqy bermeıtin kompanııalardyń shottary buǵattalýda

SEMEI. QazAqparat - Semeıde jumysshylarǵa aılap-jyldap jalaqy bermeı otyrǵan kásiporyndarmen kúres júrgizilýde, dep habarlaıdy QazAqparat tilshisi.  

Máselen, 60-qa jýyq jumysshysyn sandaltyp, ótken jyldyń shilde aıynan beri aılyq  bermeı kele jatqan «Jańa Semeı shpal zaýyty» AQ-nyń jalpy  qaryzy - 25 mln teńge. Shydamy taýsylǵan jumysshylar quzyrly organdardan kómek suraǵan.  

Semeı qalalyq Eńbek ınspektsııasy basshysynyń mindetin atqarýshy Qaırat Jókebaev qazir jumysshylardyń máselesi sheshilip jatqanyn jetkizdi. Búgingi kúni  kásiporynnyń esep-shottary buǵattalǵan. Jumysshylarǵa arnaıy anyqtama qujat berilip, olar sonymen sotqa aryz beredi. Solaısha, buǵattalǵan esep-shottan aqshalaryn ala alady.    

«Kásiporyndarda qyzmetkerler aldyndaǵy qaryz máselesi bolmaýy kerek. Ár adam óz eńbekaqysyn alýǵa quqyly. Qazir osy máselelerdi sheshýge tyrysyp jatyrmyz. Kásiporyn basshylary túrli jaǵdaıdy syltaý etip jalaqy bermeıdi. Mysaly, bir kásiporyn ekonomıkalyq daǵdarysty, endi biri kiristiń azdyǵyn alǵa tartady. Sondyqtan keı kásiporyndardyń shottaryn buǵattaýǵa májbúrmiz», -dedi Qaırat Jókebaev.

Sonymen qatar búginde atqarylǵan jumystar nátıjesinde birqatar kásiporyn jalaqy qaryzdaryn óteı bastaǵan. Máselen, «Tasymal kóligi» jáne «Qurastyrmaly temirbetony óndiristik birlestigi» JShS jumysshylarǵa aılyqtaryn kezeń-kezeńmen berýde. «Tasymal kóligi» kásipornynyń ókili Rýslan Ábdilovtyń sózinshe, 17 mln 700 myń teńge qaryzdan búginde 6,7 mln teńge qalǵan. 11 mln teńgeni eki jarym aı ishinde tólegen. Endi qalǵan qaryzdy jabý úshin bir jarym aı ýaqyt kerektigin aıtýda.    

Qaryzdy óteýmen kúres sonymen qatar «Rodnıkovoe» jáne «Tasqara» JShS-larmen júrip jatyr. Mundaǵy jumysshylar jalaqylaryn jyldap ala almaı otyr.