Semeıde zeınetkerdi aldap soqqan týysy úıin óz atyna aýdaryp alǵan

SEMEI. QazAqparat – Semeı qalasynda zeınetkerdiń 10 mln teńge turatyn úıin óz atyna aýdaryp alǵan alaıaq ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, «102» jedel arnasyna 68 jastaǵy qala turǵyny habarlasqan. Óz sózinde ol týysynyń úıge tirkeýge turý úshin senimhat jasaımyn dep aldap, úıin atyna aýdaryp alǵanyn jetkizdi.

«Osynyń saldarynan jábirlenýshige keltirilgen materıaldyq zalal mólsheri 10 000 000 teńgeni qurady. Jedel-izdestirý sharalaryn júrgizgen tártip saqshylary kúdiktini ustady. Jaýap alý kezinde ol óz kinásin moıyndady. Oǵan qatysty kelý týraly mindetteme túrinde bultartpaý sharasy tańdaldy», - delingen aqparatta.

Qazirgi ýaqytta atalǵan fakti boıynsha QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary júrgizilýde.

Esterińizge sala ketsek, osyǵan deıin Semeı turǵyny arzan temeki alamyn dep alaıaqqa 10 mln teńge bergenin habarlaǵan edik.