Semeıde úılerin káriz sýy basqan turǵyndardyń shyǵyny tolyqtaı óteledi
Qala ákimi Nurbol Nursaǵatov, «Semeı Vodokanal» kompanııasynyń basshysy Erken Saǵyndyqov jáne Semeı qalalyq TJB bastyǵynyń orynbasary Qymbat Kópbaev aýlalaryn sý basqan Bı Boranbaı jáne Shırokaıa kóshelerindegi jer úılerdi tekserdi.
«Búgin Bı Boranbaı kóshesindegi sýlardy tolyq soryp tazalaımyz. Qazirgi tańda 6 úıge sý kirgen, biraq úlken zalal keldi deýge kelmeıdi. Qazir osyǵan oraı arnaıy komıssııa quryldy. Komıssııa alty úıdi aralap tekserip shyǵady. Al sý kirgen 10 aýlaǵa tekserý erteń júrgiziledi. Sodan soń komıssııa shyǵarǵan sheshimge sáıkes tıisti jumystardy júzege asyramyz. Turǵyndarǵa keltirilgen shyǵyn tolyq óteledi. Bul jaǵdaı meniń tolyq baqylaýymda»,- dedi shahar basshysy Nurbol Nursaǵatov.
Qazirgi tańda káriz kollektoryndaǵy aqaýdyń orny anyqtaldy. Oqıǵa ornynda Semeı qalalyq TÚKSh bóliminiń mamandary jáne TJB qyzmetkerleri jumys isteýde. Aýlalaryna sý kirgen úılerdiń tizimi jasalyp, tekserý jumystary júrip jatyr.
Eske salsaq, keshe qaladaǵy qubyr káriz dıýkeri bitelip qalyp, 16 aýla men 6 úıdi káriz sýy basyp qalǵan bolatyn.