Semeıde úshinshi jylý elektr ortalyǵyn salý josparlanyp otyr

<p>Semeı qalasynda jylý jelileriniń 68%-ǵa tozǵany baıqalady. Oǵan qosa, qalada úshinshi jylý-elektr ortalyǵynyń tehnıkalyq-ekonomıkalyq negizdemesi ázirlendi. Bul týraly Abaı oblysynyń ákimi Nurlan Uranhaev elordadaǵy esep berý brıfınginde aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Infraqurylymdyq sıpattaǵy júıelik problemalardy sheshýge erekshe nazar aýdarylyp keledi. Eń mańyzdy másele – jylýmen jabdyqtaý. Semeıdegi oń jaǵalaýda 125 Gkal jylý energııasynyń tapshylyǵy boldy. Ony azaıtý úshin eki jylý qazandyǵy qaıta jańǵyrtýdan ótip, jylý qýaty 40 Gkal-ǵa deıin ulǵaıdy. Qalǵan tapshylyq – 85 Gkal», - dedi Nurlan Uranhaev Astanadaǵy Ortalyq kommýnıkatsııalar qyzmetinde ótken brıfıngte.

Sol sııaqty Abaı oblysynda jylý jelileriniń de tozý máselesi bary aıtyldy. Olardyń jalpy uzyndyǵy – 464,5 shaqyrym. Ortasha tozý – 68%. Jeliniń 279 shaqyrymy qaıta jóndeýdi qajet etedi.

«Bıyl 24 mlrd teńgege jylý jelileri men kózderin jóndeý, rekonstrýktsııalaý boıynsha josparly jumystar júrgizildi. Prezıdent tapsyrmasymen jyl aıaǵyna deıin jańa úshinshi jylý-elektr ortalyǵynyń tehnıkalyq-ekonomıkalyq negizdemesi ázirlenip bolady», - dedi óńir basshysy.

Sonymen birge, N. Uranhaevtyń aıtýynsha, Semeı qalasyn damytýdyń bas jospary bekitilýge jaqyn.

«Memleket basshysynyń tapsyrmasy boıynsha Semeı qalasyn damytýdyń Bas josparyn ázirleý jumystary júrgizilýde. Sonymen qatar, Semeıge qarasty 32 eldi mekenniń basyn qosyp, derbes Jańasemeı aýdanyna biriktirý jáne Maqanshy aýdanyn qaıta bólý boıynsha jumystar júrgizilýde. Qart Semeıdiń keskin-kelbetin jaqsartý, turǵyndarǵa jaıly orta qalyptastyrý baǵytynda da jumystar úzdiksiz atqarylyp keledi. Kópqabatty úılerdiń 70-ke jýyq aýlasy abattandy. 41 kóppáterli turǵyn úıdiń qasbeti jóndeýden ótip, 9 úıge mýraldar salyndy», - deıdi N. Uranhaev.

Aıta keteıik, Abaı oblysy óziniń alǵashqy jylynda áleýmettik-ekonomıkalyq kórsetkishter boıynsha senimdi ósim kórsetip otyr.

Ondaǵy ortasha aılyq jalaqy 17,6%-ǵa ósip, 292,8 myń teńgeni qurady. Oblys bıýdjetiniń óz kiristeri 141%-ǵa ósip, qazynaǵa 87,4 mlrd teńge túsirdi.