Semeıde ulttyq mereke qarsańynda 64 otbasyǵa páter kilti tabystaldy
Abaı oblysy ákimdiginiń málimetine súıensek, Respýblıka kúni qarsańynda Semeı qalasynda 64 otbasyǵa páter kilti tabys etildi. Turǵyn úı «Qaraǵaıly» shaǵyn aýdanynda ornalasqan. Aımaq basshysy Nurlan Uranhaev turǵyndardy qonys toılarymen quttyqtap, aldaǵy ýaqytta úı qurylysynyń qarqyny ósetini týraly aıtyp ótti.
«Memleket basshysynyń qoldaýymen óńirimiz damý jolyna túsip keledi. Keshendi jospar qabyldanyp, tyń jobalar iske asyrylatyn bolady. Turǵyn úı qurylysynyń qarqynyn ulǵaıtýdy josparlap otyrmyz. Bıyl qalada qarjylandyrýdyń barlyq kózderi esebinen 5 166 páter salynbaq. Osylaısha, kezeń-kezeńimen baspana sanyn ulǵaıtamyz», - dedi ol.
Aıtýynsha, Semeıdiń oń jaǵalaý bóligindegi «Qaraǵaıly» shaǵyn aýdanyn damytý jobasy ázirlengen. Aldaǵy ýaqytta munda 227 turǵyn úı salynyp, 35 myńnan asa adam turady.
Qazirde aýdan sý qubyry, kanalızatsııa, telekommýnıkatsııa, jylý jáne elektr energııasynyń magıstraldyq jelilerimen qamtamasyz etilgen.
Shaǵyn aýdanda Nazarbaev zııatkerlik mektebi, 320 oryndyq balabaqsha, 5 600 oryndyq «Arena» mádenı-sporttyq kesheni ornalasqan. Búgingi tańda jalpy aýdany 253,4 myń sharshy metr bolatyn 41 úı paıdalanýǵa berilgen.