Semeıde túrme aýmaǵyna esirtki laqtyrmaq bolǵan eki adam ustaldy
ShQO boıynsha QAJ departamenti baspasóz qyzmetiniń málimetine súıensek, OV-156/15 túzetý mekemesi aýmaǵynda jedel jáne tártip bólimi men Ulttyq ulan qyzmetkerleri patrýldeý kezinde eki er adamdy ustady. Tekserý barysynda olardan skotchpen oralǵan túıinshek tárkilendi.
«Onyń ishinde ótkir ıisi bar ósimdik tektes zat pen 34 500 teńge kóleminde aqsha jatqan. Kúdiktiler Semeı qalasynyń turǵyndary bolyp shyqty. Olar tyıym salynǵan zattardy mekeme qorshaýynan laqtyrmaq bolǵanyn moıyndady», - delingen aqparatta.
Atalǵan fakti boıynsha Polıtsııa basqarmasynyń tergeý-jedel toby shaqyrtylyp, zattardy tárkileý aktisi jasaldy. Zattar sot-medıtsınalyq saraptamaǵa jiberildi.
Sondaı-aq OV 156/20 mekemesiniń qyzmetkerleri Óskemen qalasynyń 37 jastaǵy turǵynyn ustaǵan. Ol túrmege 4 bótelke alkogoldi ishimdik pen uıaly telefon kirgizbek bolǵan. Ustalǵan azamat ákimshilik jaýapkershilikke tartylady.