Semeıde turǵylyqty tirkeýi joq saılaýshylar 5 ýchaskege baryp daýys bere alady

SEMEI. QazAqparat – Semeı qalasynda turǵylyqty tirkeýi joq saılaýshylar 5 ýchaskege baryp daýys bere alady, dep habarlaıdy QazAqparat tilshisi.

Qala ákimdiginiń málimetine súıensek, 20 qarasha kúni Semeıde turǵylyqty tirkeýi joq saılaýshylar óz daýystaryn berýi úshin tıisti jaǵdaı jasalǵan. 5 saılaý ýchaskesinde olar úshin tirkeý servısteri jumys isteıdi.

«Túrli sebeptermen tirkelip úlgermegen jáne tizimge engizilmegen turǵyndar ýaqytsha tirkelý úshin osy ýchaskelerge ótip, daýys berýge múmkindik alady. «Saılaý týraly» QR Konstıtýtsııalyq zańy saılaý ýchaskeleriniń mekenjaılary boıynsha esh jerde tirkelmegen azamattardy bir táýlikke tirkeýge ruqsat beredi. Atalǵan ýchaskelerdiń mekenjaılary:

- №44 mektep (Bobrovka kenti, Stroıtelnaıa kóshesi, 8);

- №49 mektep (Ushaktar shaǵyn aýdany, 1);

- №2 mektep (Sátpaev kóshesi, 218);

- №34 mektep (Voshod kenti);

- №47 mektep (6-lınııa kóshesi, 18a)», - delingen aqparatta.

Aıta keteıik, saılaý kúni shahar halqy jalpy sany 149 ýchaskege baryp daýys bere alady. Onyń ishinde 19-y jabyq saılaý ýchaskesi.