Semeıde toı ótkizip, Qaırat Nurtasty shaqyrǵandarǵa qatysty tekserý júrip jatyr

SEMEI. QazAqparat – Semeı qalasynda toı ótkizip, Qaırat Nurtasty shaqyrǵandarǵa qatysty ShQO Sanıtarııalyq-epıdemıologııalyq baqylaý departamenti tekserý júrgizýde, dep habarlaıdy QazAqparat tilshisi.

23 naýryzda áleýmettik jelilerde Semeıdegi meıramhanalardyń birinde ótken toıda bolǵan estrada juldyzy Qaırat Nurtas pen qonaqtardyń vıdeolary jarııalanýda. QR jáne oblystyń bas memlekettik sanıtarııalyq dárigerleriniń qaýlylaryna sáıkes, toı ótkizýge tyıym salynǵan.

«Karantın talaptaryn buzǵan meıramhana ıesine qatysty tıisti materıaldar túsken. Qazirgi ýaqytta osy fakti boıynsha ShQO SEBD Semeı qalalyq Sanıtarııalyq-epıdemıologııalyq baqylaý basqarmasy tekserý júrgizýde. Sonyń nátıjeleri boıynsha kináli tulǵalarǵa QR «Ákimshilik quqyq buzýshylyq týraly» Kodeksiniń 425-baby 1-bóligine sáıkes ákimshilik sıpattaǵy sharalar qabyldanatyn bolady. Túsken materıaldar zańnamada belgilengen merzimde qaralady», - dep habarlady ShQO Sanıtarııalyq-epıdemıologııalyq baqylaý departamentiniń baspasóz qyzmeti.

Vedomstvo málimetinshe, Shyǵys Qazaqstan «jasyl» aımaqta bolsa da QR jáne oblystyń Bas memlekettik sanıtarııalyq dárigeriniń qaýlylarymen belgilengen shekteý sharalaryn qatań saqtaý qajet.