Semeıde temirjol jıegin qoqystan tazartý jumystary bastaldy
11 mamyr kúni qala ákimi Ermak Sálimov temirjol bóliminiń basshylyǵymen, turǵyn úı-kommýnaldyq sharýashylyq bóliminiń ókilderimen temirjoldarǵa jaqyn aýmaqtyń sanıtarlyq jaǵdaıyna baılanysty keńes ótkizgen edi. Kezdesý barysynda qala ákimi atalǵan aýmaqtardy tazartý boıynysty naqty tapsyrmalar berdi. Sebebi, jol jıeginde shashylyp, úıilip jatqan qoqys qaldyqtarynan qutylý ózekti máselelerdiń qatarynda.
Temirjol aýmaǵyn qoqystan tazalaý jumystary aı saıyn júrgiziledi. Degenmen, turǵyndardyń tazalyq máselesine nemquraıdylyq tanytý saldarynan tazartylǵan keıbir aýmaqtar qaıta qoqys alańyna aınalady.
«Temirjol jıegin qoqystan tazalý jumystarymen kúres únemi júrgiziledi. Biraq nátıje joq. Barlyq temirjol mańy qoqysqa toly. Búgin tazalasaq, erteń qoqys shashylyp jatady. Sondyqtan barlyǵyn tazalyq jumystaryna jaýapkershilikpen qaraýǵa shaqyramyz», - dedi «QTJ» UK» AQ-nyń «Semeı júk tasymaly bólimshesi» fılıalynyń dırektory Erǵazy Jumadilov.
Sondaı-aq, temirjol mańyna qoqys tastaıtyndar turmystyq qaldyqtardy qaladan shyǵarýmen aınalysatyn kásiporyndarmen kelisimshartqa otyrmaǵan shaǵyn jáne orta bıznes ókilderi. Qazir Semeı qalalyq TÚKSh bóliminiń mamandary olarmen kezdesip, túsindirý jumystaryn júrgizip jatyr. Eger zańsyz qoqys tastaýdy jalǵastyrsa, ákimshilik hattama toltyrylyp, 27 AEK -ten bastap aıyppul salynady. Al búgingi kúnge deıin 148 ákimshilik hattama toltyrylǵan. Jalpy somasy 528 myń aıyppul salynǵan.