Semeıde tarıhı-mádenı muralardy saqtaý jónindegi jumys toby qurylady

SEMEI. QazAqparat – Semeıde kelesi jyly oblystyq tarıhı-ólketaný mýzeıiniń shatyry jóndeledi. Budan bólek, sımfonııalyq orkestrdi qaıta jańǵyrtý josparlanýda. Bul týraly Abaı oblysynyń ákimi Nurlan Uranhaevtyń Semeıdegi mádenıet nysandaryn aralaýy barysynda aıtyldy, dep habarlaıdy QazAqparat tilshisi.

Oblys ákimdiginiń málimetine súıensek, Nurlan Uranhaev eń áýeli Abaı atyndaǵy oblystyq ámbebap kitaphanasyna bardy. Aımaq basshysy kitaphanamen tanysyp, onyń bazasynda jumys isteıtin «Otbasy ortalyǵy» qoǵamdyq qoryna da taban tiredi.

«Biz azamattarǵa psıhologııalyq qyzmetter kórsetemiz. Muqtaj jandarǵa kıim-keshekpen kómektesemiz. Aıyna shamamen 40-50 otbasyn azyq-túlik jıyntyǵymen qamtamasyz etemiz», - dedi qor basshysy Janna Jıbraeva.

XIX ǵasyrdyń ekinshi jartysynda qurylǵan kitaphananyń tarıhy baı. Mekeme qyzmetkerleriniń aıtýynsha, kitaphananyń alǵashqy oqyrmandarynyń biri – qazaqtyń uly aqyny Abaı Qunanbaıuly bolǵan. 1992 jyly QR Úkimetiniń sheshimimen kitaphanaǵa Abaı esimi berildi.

Sodan soń oblys ákimi Qazaqstandaǵy eń kóne jáne iri mýzeılerdiń biri – Semeı qalasynyń oblystyq tarıhı-ólketaný murajaıyna bardy. Munda óńir basshysyna ǵımarat shatyrymen baılanysty másele bar ekeni aıtyldy.

«Tóbeden sý aǵyp jatyr. Biz tıisti mekemege ótinish berdik. Osy baǵytta jumys istep jatyrmyz. Sondaı-aq murajaı ǵımaraty sonshalyqty úlken emes. Barlyq qolda bar eksponattardy ornalastyra almaımyz. Murajaı aýmaǵynda taǵy bir qurylys jasasa jaqsy bolar edi», - dedi mýzeı dırektory Qaırat Sabyrbaı.

Nurlan Uranhaev bul máselelerdi baqylaýǵa alatynyn atap ótip, kelesi jyly murajaıdyń shatyryn jóndeýge qarajat bólinetinin aıtty.

Odan keıin ákim Ámire Qashaýbaev atyndaǵy memlekettik fılarmonııa jumysymen tanysty. Fılarmonııa 1945 jyldyń qazan aıynda Jambyl atyndaǵy Qazaq memlekettik fılarmonııasy janyndaǵy Semeı kontserttik-estradalyq bıýro retinde ashylǵan. 1969 jyly 29 shildede Qazaq KSR Mınıstrler Keńesiniń qaýlysymen fılarmonııaǵa ánshi Ámire Qashaýbaevtyń esimi berildi. Qazirgi ýaqytta osynda 180-ge jýyq maman jumys isteıdi.

Kezdesý sońynda Abaı oblysynyń ákimi mádenı jańǵyrýdyń qajettiligin atap ótti.

«Eń bastysy, bizde jumys isteı alatyn adamı kapıtal bar. Semeı árqashan mádenı ortalyq bolǵan jáne qazir de solaı bolyp qala berýde. Sondyqtan mádenıetti jańǵyrtý máselesimen aınalysý kerek. Qazir qalada tarıhı-mádenı muralardy saqtaý boıynsha jumys toby qurylýda. Bul oblys ákimi janyndaǵy keıbir máselelerdi pysyqtaıtyn top bolady», - dep túıindedi Nurlan Uranhaev.

Foto: semeynews.kz