Semeıde sýıtsıd jasaǵan balalardyń sany ósti

SEMEI. QazAqparat - Semeı qalasynda kámeletke tolmaǵandar arasynda jasalǵan sýıtsıd faktileri úsheýge artty. Sýıtsıd jasaý áreketteriniń 16-dan 12-ge deıin tómendegeni baıqalady, dep habarlaıdy QazAqparat.

Osyǵan baılanysty Semeı qalasy polıtsııa basqarmasynyń bastamasymen Semeı qalasy boıynsha bilim bóliminiń basshylyǵy atynan Natalıa Anatolevna Fesenko, sondaı-aq jalpy orta bilim mekemesiniń dırektorlarymen kezdesý ótti.

Atalǵan kezdesýde kámeletke tolmaǵandar arasyndaǵy sýıtsıdtiń aldyn alý máselesi qaraldy.

«Ózine ózi qol jumsaýdyń sebepteri ártúrli, negizinen ata-ana nazarynyń jetispeýshiligi, jaqyn adamyn joǵaltý, sondaı-aq balanyń ǵalamtorda anıme kórýmen áýestenip ketkeni keıin ómirin qurtýǵa sebep bolyp jatady», - dedi jergilikti polıtsııa qyzmeti bóliminiń bastyǵy, polıtsııa maıory Baýyrjan Nurmuhameduly Sadaqbaev.

Kámeletke tolmaǵandardyń jasy - 14-17 aralyǵynda.

Ókinishke qaraı, jaqyn adamdary árdaıym jasóspirimniń aınalasynda ne bolyp jatqanyn, minez-qulqyndaǵy, kúndelikti rejımindegi jáne ádetterindegi kúrt ózgeristerdi baıqaı bermeıdi.

Eger bala kenetten depressııaǵa ushyrasa, jylasa nemese kerisinshe kenetten tym belsendi bola bastasa - bul «onyń jeke ómirinde bári jaqsy ma?» degen suraq tóńireginde oılanýǵa sebep.