Semeıde sýǵa batyp bara jatqan 39 jastaǵy er adam qutqaryldy

SEMEI. QazAqparat – Semeı qalasynyń turǵyndary sýǵa batyp bara jatqan 39 jastaǵy er adamdy qutqaryp qaldy, dep habarlaıdy QazAqparat tilshisi.

Oblystyq Tótenshe jaǵdaılar departamenti baspasóz qyzmetiniń málimetine súıensek, oqıǵa 24 shildede Semeıdegi Ertis ózeninde bolǵan.

«Sergeı Fomınyh sýǵa batyp bara jatqan er adamdy kórip, soǵan qaraı umtylǵan. Sol kezde oǵan Erjan Jáńgirov kómekke keldi. Ekeýi esinen tanǵan azamatty sýdan shyǵaryp alyp, jaǵada alǵashqy medıtsınalyq kómek kórsete bastady. Olardyń qasyna kelgen Vıktor Glınskıı zardap shegýshini aman alyp qalý úshin reanımatsııalyq áreketter jasady», - delingen aqparatta.

Áıteýir 39 jastaǵy er adam esin jıdy. Sálden soń ol jedel járdem dárigerlerine tapsyryldy.

Belgili bolǵandaı, jábirlenýshi dosymen birge shomylýǵa ruqsat etilmegen jerge kelip sýǵa túsken. Kenet esinen tanyp qalǵan ol bata bastady.