Semeıde sý tasqynynyń aldyn alý úshin qandaı sharalar atqarylýda

SEMEI. QazAqparat – Semeı qalasynda sý tasqynynyń aldyn alý úshin birqatar shara qolǵa alynǵan, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Semeıde sý tasqynyna qarsy is-sharalardy atqarýǵa búginde QR TJM №68303 áskerı bóliminiń jeke quramy tartylǵan.

«Turǵyn úılerdi sý basýyn boldyrmaý maqsatynda birqatar jumys atqaryldy. Atap aıtqanda, qamys shabý, kanaldy tereńdetý jáne Vostochnyı kenti aýdanyndaǵy sý ótkizý qubyrlaryn tazartý. Barlyǵy jeke quramnan 30 adam men 5 tehnıka jumyldyrylǵan», - delingen aqparatta.

Sonyń nátıjesinde 1 shaqyrymnan astam aryq tazartyldy. Baıǵojına kóshesi, 8-úı mekenjaıy aýmaǵynan erigen sýdy burý boıynsha jumystar ýaqtyly júrgizildi. «Jumyspen qamtý jol kartasy» baǵdarlamasy aıasynda Semeı qalasynyń 4 ýchaskesinde jaǵalaýdy nyǵaıtý jumystary qolǵa alynǵan. Ertis ózeniniń jaǵalaýyna beton plıtalar tóseledi.

Sý tasqynyna qarsy júrgizilip jatqan sharalar 1026 adam turatyn 254 turǵyn úıdiń qaýipsizdigin qamtamasyz etedi.