Semeıde sý qubyrynyń jelileri jańartylýda

SEMEI. QazAqparat – Semeı qalasyndaǵy Prıstanskaıa, Dýlatov jáne Baıseıitova kóshelerindegi sýmen jabdyqtaý sapasyn jaqsartý úshin sý qubyry jelileri qaıta jańartylýda, dep habarlaıdy QazAqparat tilshisi.

Jobanyń jalpy quny – 460 mln 801 myń teńge. Búginde turǵyndarǵa sý tartylǵan. Alaıda ol eski qubyrlar arqyly berilýde. Jumys aıaqtalǵannan keıin jergilikti jurt jańa jelige qosylatyn bolady.

«Joba «Jumyspen qamtýdyń jol kartasy» baǵdarlamasy arqyly júzege asyrylýda. Sonyń aıasynda 1 shaqyrym 686 metr sý qubyry jelilerin qaıta jańartý kózdelgen. Qazirgi ýaqytta jumys qarqyndy júrip jatyr. Baǵdarlamany júzege asyrý atalǵan ýchaskelerdegi apattardyń sanyn azaıtýǵa kómektesedi. Mundaǵy jeliler eski, jıi úzilister men apattardyń aldyn alý úshin olardy aýystyratyn kez keldi», - deıdi qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń kommýnaldyq sektorynyń basshysy Quralaı Dúısembaeva.

Aıta keteıik, búginde jumystyń 90%-y aıaqtalǵan. Joba qazan aıynda tolyqtaı máresine jetpek.