Semeıde soǵysqa qatysqan qazaqstandyqtar jónindegi derekti fılm túsirilýde

SEMEI. QazAqparat - Semeı qalasy oblystyq tarıhı-ólketaný murajaıynda Sháken Aımanov atyndaǵy «Qazaqfılm» kınostýdııasyna túsirilimder ótti, dep habarlaıdy QazAqparat.

Kınorejısser, QR KSRO Kınematograftary keńesiniń múshesi, QR eńbegi singen óner qaıratkeri Nıkolaı Raısov «Soǵystyń 60 kúni» derekti fılmin túsirýde. 

Fılmde Máskeý túbindegi shaıqasqa qatysqan qazaqstandyq dıvızııalar jaıly áńgimelenedi.
Onda Almatyda qurylǵan 316-shy atqyshtar dıvızııasy, Aqtóbede qurylǵan 312-shi atqyshtar dıvızııasy, sondaı-aq, soǵys jyldary Kalýjsk-Týlsk baǵytyndaǵy Máskeýge aparatyn ońtústik-batys shatqalyn qorǵaǵan Semeı oblysynda qurylǵan 238-shi atqyshtar dıvızııasy jaıly baıandalady. Olar Máskeý túbindegi shaıqasta erlikteri úshin 30-shy gvardııalyq atqyshtar dıvızııasy ataǵyn alǵan.
Semeı oblysy aýmaǵynda eki atqyshtar dıvızııasy qurylǵan, onyń biri 238-shi atqyshtar dıvızııasy, keıinnen 30-shy gvardııalyq ataǵyn ıemdengen.
Bul dıvızııa 1941 jyly kóktemde Almaty, Qaraǵandy, Semeı oblysy aýmaǵynda quryldy. Jeke quramy 75 paıyz negizinen qazaqtardan bolǵan. Al, dıvızııa shtaby Semeıde ornalasqan.

«Fılm túsirilimi Máskeýde, Aleksına qalasynda, Almatyda, Aqtóbede jáne Semeıde ótti. Túsirilim toby Máskeý túbindegi urysqa qatysqan UOS ardagerlerimen júzdesip, soǵys kýágerleri bolǵan Podmoskove turǵyndarymen kezdestik.
Ol kezde Podmoskove turǵyndary kishkene bala bolatyn. Alaıda sol jyldar olardyń jadynda qaldy», - deıdi derekti fılm rejısseri Nıkolaı Raısov.

Rejısser Reseı men Qazaqstannyń áskerı dańq murajaıynda bolýmen qatar óńirimizdiń tarıhı-ólketaný murajaıyna da at basyn tiregen.
Semeı qalasyndaǵy oblystyq tarıhı-ólketaný murajaıynda jaýyngerlerdiń jeke zattary, soǵys jyldardaǵy áskerı qarý men turmys quraldary, maıdan dalasynan jiberilgen hattar men fotolar, orden men medaldar saqtalyp tur.
Jaýyngerlik jáne eńbek dańqy bóliminde 238-shi atqyshtar dıvızııasyna arnalǵan ekspozıtsııalar bar. Osy ekspozıtsııa fonynda derekti fılmniń basty túsirilimderi ótken. N.Raısov bastaǵan túsirilim toby fılm daıyn bolysymen, qalaǵa ákelip semeılikterdiń nazaryna usynýǵa ýáde etti.