Semeıde soǵys ardagerleri jarty mıllıon teńgeden aldy

SEMEI. QazAqparat - 9 mamyr - Jeńis kúni merekesine oraı Semeı qalasynyń ákimi Ermak Sálimov soǵys ardagerlerin úılerine baryp quttyqtap, 500 myń teńgeniń sertıfıkattaryn tabystady, dep habarlaıdy QazAqparat tilshisi.

Qala basshysy 4 ardagerdi quttyqtady. Solardyń biri Atambaı Orazbaev. 95 jastaǵy maıdangermen áńgimelesý barysynda ákim beıbit ómir syılaǵan ardagerlerdiń erligi men eńbegi eshqashan umytylmaıtynyn aıtty.

«Qan maıdanda jeńiske jetýge sizderdiń qosqan úlesterińiz zor. Sizderdiń kórsetken erlikterińizdiń arqasynda biz, búgingi urpaq beıbit kún keship jatyr», - dedi ákim.

Atambaı Orazbaev 1923 jyly 1 qańtarda burynǵy Semeı oblysy, Jarma aýdanynda dúnıege kelgen. 1941 jyly 18 jasynda Aıagózge ásker qataryna shaqyrylady. Al 1942 jyly 25 qarashada soǵys dalasyna attanady.100-shi atqyshtar dıvızııasynyń jaýyngeri bolǵan. Harkov, Kıev, Varshava qalalaryn azat etý shaıqastaryna qatysqan. Soǵys jyldaryndaǵy kórsetken erligi úshin «Qyzyl juldyz» jáne UOS ІІ dárejeli medalimen marapattalǵan. Búgingi kúni Semeı óńiriniń qurmetti aqsaqaly.
Kezdesý sońynda qart urpaqtan egemen elimizdegi beıbit ómirdiń qadirin uǵynyp, ony qasterleýin ótindi.

Aıta keteıik búgingi kúni qalada 47 UOS ardageri turady.