Semeıde «Sergek» kameralary maýsym aıynda iske qosylady
ShQO ákimdiginiń málimetine súıensek, aımaq basshysy Danıal Ahmetov Semeıde «Sergek» foto jáne beınetirkeý jobasyn iske asyrý máselesi boıynsha jınalys ótkizgen.
«Qalada 616 kamera 74 jelilik ýchaskege jáne 40 adam kóp shoǵyrlanǵan qıylysqa ornatylady. Budan bólek, taǵy 687 syrtqy beınebaqylaý kamerasy qosymsha jumys isteıtin bolady. Ázirge keı jerlerde ornatylǵan kameralar test rejıminde iske qosylǵan», - dedi ol.
Áleýmettik jáne bıznes nysandaryndaǵy barlyq kameralar da «Sergek» júıesine biriktirilmek.
«Sıtýatsııalyq ortalyq pen derekterdi óńdeý ortalyǵy qaı jerlerde ornalasatyny belgili boldy. Barlyq jumystar bekitilgen kestege sáıkes júrgizilýde. Maýsym aıynda apparattyq-baǵdarlamalyq keshender tolyqtaı iske qosylady», - dedi Danıal Ahmetov.
Aıta keteıik, shahar turǵyndary qandaı da bir saýaldary bolsa «109» anyqtama qyzmetine habarlasa alady.