Semeıde Respýblıka kúni qarsańynda 30-dan astam kópbalaly otbasy baspanaly boldy

<p>Semeı qalasynda úı kezeginde turǵan 32 otbasyǵa baspana kilti tabystaldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Respýblıka kúnine oraı Semeı qalasynyń ákimi Nurbol Nursaǵatov kópbalaly otbasylarǵa Ushaqtar kentinen jeke turǵyn úılerdiń kiltin tabystady. Jyl basynan beri páter kezeginde turǵan kópbalaly januıalarǵa Komsomol kentinen 50-den astam jer úıdiń kilti berilgen bolatyn.

Ár úıdiń jalpy aýdany – 80-100 sharshy metr. Úıler jylytý peshterimen tolyq qamtamasyz etilgen, jóndeý jumystaryn qajet etpeıdi. Aýlasynda baý-baqshaǵa arnalǵan arnaıy bos oryn bar.

«Búgin 32 otbasy Arhat kóshesindegi jańa úılerine kirdi. Baspana ıelerin osyndaı aıtýly kúnmen shyn júrekten quttyqtaımyn. Jańa úıler berekeli bolyp, barsha shańyraqqa qýanysh ákelsin. Respýblıka kúni qutty bolsyn!», - dedi ákim Nurbol Nursaǵatov.

Aıta keteıik, búginde Semeıde úı kezeginde 13 000-nan astam adam tirkelgen. Osyǵan oraı Qaraǵaıly shaǵyn aýdanynda bıýdjettik kópqabatty turǵyn úıler salynyp jatyr. Sondaı-aq osy jyldyń sońyna deıin taǵy 200-den astam áleýmettik turǵyda osal jáne kópbalaly otbasy qonys toıyn toılamaq.