Semeıde polıtsııa qyzmetkerleri ınternet-alaıaqtardyń jolyn kesý úshin arnaıy top qurdy
Qalalyq Polıtsııa basqarmasy baspasóz qyzmetiniń málimetine súıensek, jýyqta 4 alaıaqtyq faktisi tirkelgen.
«Ońaı oljaǵa kenelmek bolǵan belgisiz bireý saıttardyń birine bala arbasynyń satylatyndyǵy jaıly jalǵan jarnama bergen. Osylaısha 22 jastaǵy qala turǵynynyń 120 000 teńgesin ıemdenip ketedi. Sondaı-aq taǵy bir alaıaq osy saıtqa qosalqy bólshekterdi satatyndyǵy týraly jarnama ornalastyrǵan. Buǵan sengen er adam oǵan 80 000 teńge jibere salady», - delingen vedomstvo málimetinde.
Taǵy eki oqıǵa áleýmettik jelilerde oryn alǵan. Ásel esimdi qyz uıaly telefon men planshetti arzan baǵaǵa satatyndyǵyn jazypty. Aılasyn asyrǵan ol 550 myń teńge paıda kórgen.
«Ekinshi faktide alaıaq aqsha ınvestıtsııasy jaıly habarlandyrý jarııalaǵan. «Tuzaqqa» túsken jábirlenýshi oǵan tólem termınaly arqyly 130 myń teńge jiberdi. Qazirgi ýaqytta qylmystardy ashý maqsatynda jedel-izdestirý sharalaryn júrgizetin arnaıy top qurylǵan», - dep habarlady Polıtsııa basqarmasynan.