Semeıde ózderin polıtseı retinde tanystyrǵan alaıaqtar qarttardy aldap, 24 mln teńge paıda kórgen

<p>Semeı qalasynda ózderin polıtsııa qyzmetkeri retinde tanystyrǵan alaıaqtar zeınetkerlerdi aldap, 24 mln teńge paıda kórgen, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Osy jyldyń qazan aıynyń ortasynan bastap Abaı oblysy Polıtsııa departamentine alaıaqqa aldanyp qalǵan semeılikterdiń aryzy kúrt kóbeıgen. Anyqtalǵandaı, aldyn ala sóz baılasqan belgisiz bireýler ózderin polıtsııa qyzmetkerleri retinde tanystyryp, qart kisilerge habarlasyp otyrǵan.

«Olarǵa telefon arqyly qońyraý shalyp, qyzy nemese ulynyń jol apatyna túskenin jetkizedi. Jalǵan polıtseıler balasyn bosatý úshin aqsha talap etken. Buǵan sengen turǵyndar aqshany kýrerlerge beredi», - deıdi oblystyq PD krımınaldyq polıtsııa basqarmasynyń bastyǵy Shalqar Qunanbaev.

Osynyń saldarynan jábirlenýshilerge 24 mln teńge zalal keltirilgen. Jedel izdestirý sharalaryn júrgizgen tártip saqshylary 19 jastaǵy kúdiktini anyqtap, ýaqytsha ustaý ızolıatoryna qamaýǵa aldy. Qazirgi ýaqytta onyń sybaılastary izdestirilýde. QR QK-niń 190-baby 3-bóligine (Alaıatyq) sáıkes sotqa deıingi tergeý amaldary júrgizilip jatyr.