Semeıde órt sóndirýshiler jalyn sharpyǵan dúkennen 6 gaz ballonyn shyǵaryp úlgerdi

SEMEI. QazAqparat – Semeı qalasynda órt sóndirýshiler jalyn sharpyǵan dúkennen 6 gaz ballonyn syrtqa shyǵaryp úlgerdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Gagarın kóshesindegi dúkende shatyrdyń aǵash qurylymdary men nan pisiretin elektr peshi órtengen. Oqıǵa ornyna órt sóndirýshiler shuǵyl kelip jetti.

«Tilsiz jaýdyń jalpy aýdany 15 sharshy metrdi quraǵan. Qyzyl jalyndy aýyzdyqtaý barysynda qutqarýshylar dúkennen 6 gaz ballonyn syrtqa alyp shyqty. Zardap shekken eshkim joq», - dep habarlady vedomstvo ókilderi.

Órtti óshirýge jeke quramnan 13 adam men 3 tehnıka jumyldyrylǵan. Ot elektr jabdyqtaryn paıdalaný kezinde órt qaýipsizdigi talaptarynyń saqtalmaýynan shyǵýy múmkin.