Semeıde oblystyq «Aıbyn» áskerı-patrıottyq jastar jıyny aıaqtaldy
Bıyl besinshi ret ótkizilgen sharaǵa aýdan jáne qala mektepterinen 15 áskerı sporttyq klýb qatysty. Bul saıysta óńirlik úzdik oqýshylar respýblıkalyq «Aıbyn» áskerı patrıottyq jıynyna irikteledi.
Jastar jyly aıasynda QR Qarýly kúshteriniń uıymdastyrýymen ótken jıynnyń maqsaty - salaýatty ómir saltyn nasıhattap, jastardyń áskerı-qoldanbaly jáne tehnıkalyq daıyndyqqa ázirleý.
«Jarys bolashaqta otanyn qorǵaıtyn azamattardy tárbıeleıdi. Ár mektep joǵary deńgeıde daıyndyq júrgizip, saıysqa eń myqty quramalar qatysýda», - dedi Áskerı-sporttyq klýbtar federatsııasynyń tóraǵasy Serik Túsipov.
150 oqýshy avtomatty qurastyrý, kermege tartylý, qorǵanysh kıimin jedel kııý, jerden keýdeni kóterý, myltyq atý jáne áskerı estafeta sııaqty saıystar boıynsha kúsh synasty.
«Aıbyn» oblystyq áskerı-patrıottyq jastar jıynynyń nátıjesinde І oryn Shəkərim atyndaǵy kópbeıindi gımnazııanyń «Jas qyran» áskerı sporttyq klýbyna buıyrdy. Ibraev atyndaǵy orta mekteptiń «Jas ulan» áskerı sporttyq klýby 2-orynda, Elektrotehnıkalyq kolledjden kelgen «Patrıot» komandasy úzdik úshtikti qortyndylady.
Jarys jeńimpazdary Qaraǵandy oblysy Spassk oqý - jattyǵý ortalyǵynda ótetin respýblıkalyq jıynda oblys namysyn qorǵaıtyn bolady.
Foto: aibyn.kz