Semeıde Naýryz meıramyna oraı 200-den astam shara ótedi
Qala ákimdiginiń málimetine súıensek, naýryzdyń 14-i men 23-i aralyǵynda Ulystyń uly kúnin atap ótýge arnalǵan is-sharalar jospary ázirlengen.
«Barlyǵy 200-den astam shara josparlanyp otyr. Kórisý kúni, Jaılaý kúni, Shejire kúni, Tarıhqa taǵzym kúni, Igi ister kúni, Shymyrlyq pen sheberlik kúni, Zııatkerlik kúni, Ulttyq taǵamdar kúni atalyp ótiledi. 22-i kúni Arbatta merekelik kontsert ótedi. Bulaqtardy tazartý boıynsha «Taza tabıǵat» aktsııasy, ekologııalyq saǵat uıymdastyrylady», - delingen aqparatta.
Sondaı-aq múgedek jáne az qamtylǵan otbasydan shyqqan balalardy quttyqtap, qaıyrymdylyq kontsertteri ótkiziledi. Beıimdeý ortalyǵynyń búldirshinderine arnalǵan sheberlik sabaqtary jáne F.M.Dostoevskıı mýzeıinde balalar kontserti bolady.
Shahardyń bes túrli jerinde jıyrmaǵa jýyq kıiz úı ornatylmaq. Budan bólek, mereke kúni Dostyq úıiniń janynda «Dostyq dastarhany» uıymdastyrylady.