Semeıde medıtsına qyzmetkerleri Balalar úıi túleginiń baspana alýyna kómektesti
17:34, 11 Qańtar 2021
SEMEI. QazAqparat – Semeı qalasyndaǵy Jedel medıtsınalyq járdem stantsııasynyń qyzmetkerleri (JMJS) Balalar úıiniń túlegine baspana alýǵa kómektesti, dep habarlaıdy QazAqparat tilshisi.
On segiz jastaǵy semeılik Borıs Gýsev úshin Jedel medıtsınalyq járdem stantsııasynyń qyzmetkerleri jańajyldyq syılyq jasady. Olar ata-anasynyń qamqorlyǵynsyz qalǵan balalarǵa kómek kórsetý maqsatynda jasalǵan memorandým sheńberinde 2013 jyldan bastap Borıstyń atyna ashylǵan arnaıy banktik shotqa aqsha salyp otyrǵan.
Osylaısha, 2020 jyldyń jeltoqsan aıynda Balalar úıiniń túlegi kámelettik jasqa tolyp, jınaqtalǵan qarajattyń arqasynda óz úıine qol jetkizdi.
«Biz Borıske kómektesip, ony qoldap, onyń baspanaly bolýyna óz úlesimizdi qosqanymyzǵa shyn qýanyshtymyz. Jańa qonysymen quttyqtaı otyryp oǵan densaýlyq, baqyt jáne bul dúnıedegi barlyq jaqsylyqty tileımiz», – dedi Semeı qalasynyń JMJS ujymy.