Semeıde maqtaaraldyqtarǵa kómek aktsııasy bastaldy

SEMEI. QazAqparat – Búgin Semeı qalasynda sý tasqynynan zardap shekken Maqtaaral aýdanynyń turǵyndaryna kómek berý aktsııasy bastaldy, dep habarlaıdy QazAqparat tilshisi.

Ortalyq qalalyq meshit aldynda azyq-túlik pen birinshi qajettilik zattary jınalýda. Qaıyrymdylyq aktsııasynyń uıymdastyrýshylary – QMDB-nyń Semeı aımaǵy boıynsha ókildigi, «Zeket» qory jáne eriktiler.

«Maqtaaralda sý tasqyny bolǵanyn jalpy el biledi. Osyǵan baılanysty jerlesterimiz zardap shekkenderge kómek kórsetpek. Óıtkeni, bizdiń óńirde qandaı da bir qıyndyqtar bolǵan kezde elimizdiń barlyq oblystary qolushyn sozǵan. QMDB men «Zeket» qory zardap shekkenderge qarjylaı kómek kórsetý úshin atalmysh aktsııany uıymdastyryp otyr. Oǵan qala eriktileri de atsalysyp, azyq-túlik pen kıim-keshek jınaýda. Biz barsha semeılikterdi muqtaj jandarǵa qolushyn sozýǵa shaqyramyz», - deıdi QMDB-nyń Semeı óńiri boıynsha bas ımamy Asqar Ábitaıuly.

Onyń aıýtynsha, 4-5 kún boıy meshit aldynda júk kólikteri turatyn bolady. Oǵan azyq-túlik jáne basqa da qajetti zattar salynbaq. Kólikter tolǵan sátte Maqtaaralǵa jiberiledi.

«Sý tasqynynan zardap shekkenderge kómektesý úshin tez buzylmaıtyn ónimderdi, ıaǵnı kıim, jastyq, kórpe jáne basqa qajetti zattardy ákelýge bolady. Sondaı-aq kez kelgen somany «Zeket» qoryna 4400 4301 1208 7538 nómiri arqyly jiberip, qarjylyq qoldaý kórsete alasyzdar», - deıdi bas ımam.