Semeıde kópqabatty úıden órt shyǵyp, 16 bala qutqaryldy

SEMEI. QazAqparat – Semeı qalasynda órt shyqqan kópqabatty úıden 31 adam qutqarylyp, 50 turǵyn evakýatsııalandy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, Fızkýltýrnaıa kóshesindegi 9 qabatty úıde órt shyqqan.

Qyzyl jalyn altynshy qabattaǵy páterde jıhaz ben jeke zattardy sharpydy.

«Oqıǵa ornyna qutqarýshylar jedel kelip jetti. 6-qabatqa deıin avtosatyny kóterip, 16 jáne 14 jastaǵy eki balany tútin tumshalaǵan úıden alyp shyqty. Olar ýlaný belgisimen medıtsınalyq mekemege jetkizildi. Taǵy 31 turǵyn, onyń ishinde 14 bala órt sóndirýshilerdiń kómegimen baspaldaq arqyly qutqaryldy», - delingen aqparatta.

Balalaryn óz betimen qutqarmaq bolǵan 42 jastaǵy páter ıesi kúıik alyp, aýrýhanaǵa jatqyzyldy.

Sondaı-aq TJD qyzmetkerleri qaýipti aımaqtan 50 adamdy, onyń ishinde 15 balany evakýatsııalady.

«Tilsiz jaýdy aýyzdyqtaýǵa jeke quramnan 40 adam jáne 10 tehnıka jumyldyrylǵan. Aldyn ala málimet boıynsha órttiń shyǵý sebebi – elektr jabdyqtaryn paıdalaný kezinde qaýipsizdik talaptaryn saqtamaýdan», - delingen habarlamada.

Esterińizge sala ketsek, osyǵan deıin Óskemende páterden órt shyǵyp, eki bala zardap shekkenin habarlaǵan edik.