Semeıde kópbalaly otbasylarǵa turǵyn úı kilti tabystaldy

SEMEI. QazAqparat – Búgin Semeı qalasynyń ákimi Nurbol Nursaǵatov Qazaqstan Konstıtýtsııa kúnin merekeleý qarsańynda memlekettik turǵyn úı qorynda «Kópbalaly otbasy» sanaty boıynsha kezekte turǵan 10 otbasyna Komsomol kentinen jeke turǵyn úılerdiń kiltin tabystady, dep habarlaıdy QazAqparat.

Semeı qalasy ákimdigi baspasóz qyzmetiniń málimetinshe, bul – satyp alý quqyǵynsyz jaldamaly turǵyn úıler.

«Búgin 10 otbasyǵa Komsomol kentindegi Bódene kóshesindegi úılerden baspanaly boldy. Maýsym aıynda 27 otbasyǵa Qaraǵaıly shaǵyn aýdanynan páter kiltterin tabystaǵan bolatynbyz. Al búgin qalamyzdyń sol jaǵalaýynda jer úıdiń kiltin tabystap otyrmyz. Baspana ıelerin osyndaı aıtýly kúnmen shyn júrekten quttyqtaımyn! Jańa úıler berekeli bolyp, barsha shańyraqqa qýanysh ákelsin!» - dedi qala ákimi Nurbol Nursaǵatov.

Aıta keteıik, osy jyldyń qyrkúıek aıynyń sońyna deıin Komsomol kentinen taǵy 32 kópbalaly otbasy baspanaly bolmaq. Sondaı-aq Semeı qalasy boıynsha úı kezeginde 13 000-nan astam qala turǵyny tirkelgen. Osyǵan oraı, Qaraǵaıly shaǵyn aýdanynda 26 bıýdjettik kópqabatty turǵyn úıdiń qurylys jumystary júrgizilip jatyr.

2023 jyldyń sońyna deıin memlekettik baǵdarlama boıynsha salynyp jatqan 15 kópqabatty turǵyn úıdiń (487 páter) qurylysyn aıaqtaý josparlanyp otyr.