Semeıde kópbalaly analarǵa jańa páterdiń kilti tabystaldy

SEMEI. QazAqparat - Shyǵys Qazaqstan oblysynyń ákimi Danıal Ahmetov Semeıdegi Qaraǵaıly shaǵyn aýdanynda bolyp, bes kóp balaly anaǵa jańa turǵyn úıdiń kiltin tabys etti. Bul týraly QazAqparat tilshisi habarlaıdy.

Páterlerdi aralaǵan óńir basshysy turǵyn úılerdiń sapasyna rıza boldy. D.Ahmetov kópbalaly analardy jańa qonystarymen quttyqtap, barlyǵyna densaýlyq pen baqyt tiledi.

"Búgin biz Elbasynyń tapsyrmasy boıynsha alǵashqy qadamdar jasadyq. Bıyl kópbalaly analarǵa 200-den astam páter beriledi. Osy jumystar Semeı qalasynda bolyp jatqanyna qýanyshtymyn. Bul shaǵyn aýdan men úshin erekshe. Meniń oıymsha, Qaraǵaıly etalondyq aýdan bolyp, Semeıdiń alǵa qaraı damıtyn standarttaryn qalyptastyrady", - dedi aımaq basshysy.

Óz kezeginde kópbalaly analar ákimge alǵys aıtyp, jyly lebizderin bildirdi.

Qurylys salýshylarmen áńgimelesý barysynda Danıal Ahmetov shaǵyn aýdannyń arhıtektýralyq kelbetin árlendirýdi tapsyrdy. Jalpy, aımaq basshysy Qaraǵaıly aýdanynda salynyp jatqan turǵynúıdiń sapasyn joǵary baǵalady.