Semeıde kommýnaldyq mekeme eki jyl boıy kásipkerlerge eshqandaı sebepsiz jylý bermegen

SEMEI. QazAqparat - Semeıde kommýnaldyq kásiporyn kásipkerlerdi jylýǵa qosýdan zańsyz bas tartqan, dep habarlaıdy QazAqparat Antıkor qyzmetine silteme jasap.

Abaı oblysy boıynsha Sybaılas jemqorlyqqa qarsy qyzmet departamentiniń qyzmetkerleri «jylý berýshiler» tarapynan kásipkerlik qyzmetke zańsyz aralasýdy anyqtady.

Máselen, bıznesmenderdiń ótinishin zerdeleý barysynda «Teplokommýnenergo» MKK eki jyl boıy qurylys obektilerin qalany jylýmen jabdyqtaý jelisine qosýǵa tehnıkalyq sharttar berýden zańsyz bas tartqany belgili boldy.

Bas tartýǵa qalalyq jylý jelisiniń ótkizý qabiletiniń bolmaýy degen sebep bolǵan.

Bul rette, materıaldardy zerdeleý barysynda «Teplokommýnenergo» keıinirek júgingen basqa kásipkerlerge jylýǵa qosylýǵa ruqsat bergeni anyqtaldy.

Sybaılas jemqorlyqqa qarsy is-qımyl departamenti kásiporyn basshylyǵymen jáne ótinish bildirgen kásipkerlermen kóshpeli kezdesý ótkizdi.

Eki kúnnen keıin Teplokommýnenergo dárihanaǵa jáne azyq-túlik dúkenine jylýmen jabdyqtaýǵa qosylýǵa tehnıkalyq shart berdi.