Semeıde kommýnaldyq qyzmetke 132 mln teńge jumsalatyn mádenı keshenniń shyǵyny azaımaq

SEMEI. QazAqparat – Semeı qalasyndaǵy «Arena» mádenı-sporttyq kesheniniń shyǵynyn azaıtý úshin atyn demeýshi brendke berý kózdelip otyr, dep habarlaıdy QazAqparat tilshisi.

Abaı oblysy ákimdiginiń málimetine súıensek, Semeıdegi eń úlken mádenı keshen 2019 jyly salynǵan. Onda sport zaldary, basseın, stadıondar, kontsert alańdary bar. Ártúrli mádenı, sporttyq, tanymdyq sharalar ótkizilip, óner ıeleriniń keshteri, kontsertteri uıymdastyrylyp keledi.

Alaıda keshenniń kommýnaldyq qyzmetke jumsaıtyn shyǵyny qomaqty bolyp tur. Naqty aıtqanda, jylyna bul úshin 132 mln teńgeden astam qarjy jumsalady.

«Osy rette, Neımıng tásilin qoldaný josparlanýda. ıAǵnı, «Arena» mádenı-sporttyq keshenine demeýshi brendtiń ataýyn berip, tabys tabý. Osylaısha, Semeıdegi aýqymdy nysannyń ataýy ózgerýi múmkin. Utymdy jaǵyna toqtalar bolsaq, bul arqyly keshendi kútip-ustaýǵa ketetin shyǵyndardy azaıtýǵa bolady. Al únemdelgen qarajat esebinen balalar sportyn damytý úshin tegin úıirmeler men sektsııalar ashýǵa múmkindik týady», - delingen aqparatta.

Vedomstvo dereginshe, Neımıng tájirıbesi - álemde keń taraǵan úrdis. Stadıonnyń ataýyn birneshe jylǵa jalǵa berý arqyly túsken qarajat keshender men sporttyq komandalarǵa jumsalatyn shyǵyndardy azaıtýǵa septigin tıgizedi.

Eske salsaq, osydan eki jyl buryn atalǵan keshenge Nursultan Nazarbaev esimin berý usynylǵan edi.