Semeıde kómir berý júıesi isten shyqqan JEO-da áskerıler 34 tonna kómirdi qolmen salyp shyqty

SEMEI. QazAqparat – Semeı qalasynda kómir berý júıesi isten shyqqan jylý elektr ortalyǵynda áskerıler 34 tonna kómirdi qolmen salyp shyqty, dep habarlaıdy QazAqparat tilshisi.

Tótenshe jaǵdaılar mınıstrligi resmı ókili Rýslan Imanqulovtyń málimetinshe, Semeıdegi jylý elektr ortalyǵynda kómir berý júıesi isten shyqqannan keıin úıler jylýsyz qalmas úshin áskerıler toqtaýsyz jumys istep jatyr.

«TJM 68303 áskerı bólimi men QM 28738 áskerı bóliminiń jeke quramy jalpy kólemi shamamen 34 tonna kómirdi qazandyq agregatyna úzdiksiz qolmen salyp otyrdy. Jumys áli kúnge deıin jalǵasýda. Elektr kabelin aýystyrý boıynsha qalpyna keltirý jumystaryn JEO qyzmetkerleri atqaryp jatyr. Qazir syrtqy aýa temperatýrasy - mınýs 26 gradýs», - dedi ol.

Eske salsaq, búgin saǵat 00:34-te Semeı qalasynda №1 JEO-da uzyndyǵy 6 metr alańda transporter lentasy men elektr kabelderi janǵan bolatyn.

Saǵat 1.36-da órt tolyǵymen sóndirildi. Órt saldarynan kómir berý júıesiniń jumysy toqtatyldy.

Sondaı-aq JEO-da kómir berý júıesinen basqa agregattar tolyqtaı jumys istep turǵany habarlanǵan.