Semeıde kólik qaqqan 20 jastaǵy jigit kóz jumdy
09:50, 02 Jeltoqsan 2021
SEMEI. QazAqparat – Semeı qalasynda eki adamdy kólik qaǵyp ketti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 1 jeltoqsan kúni keshki saǵat 22:20-da Qabanbaı batyr men Gette kósheleriniń qıylysynda bolǵan.
«Land Rover kóliginiń 29 jastaǵy júrgizýshisi rettelmegen jaıaý júrginshiler jolaǵynan ótip bara jatqan eki adamdy qaǵyp, sol jerden iz sýytty. 20 jastaǵy jigit oqıǵa ornynda kóz jumdy. Al jaraqat alǵan 16 jastaǵy qyz aýrýhanaǵa jatqyzylǵan», - delingen aqparatta.
Qazirgi ýaqytta polıtsııa qyzmetkerleri kúdiktini ustady. Oǵan qatysty QR Qylmystyq Kodeksiniń 345-baby 3-bóligi jáne 347-babyna sáıkes sotqa deıingi tergeý amaldary bastaldy.