Semeıde qoqys shyǵarýdyń jańa tarıfi bekitildi
Búgin Semeı qalasy máslıhatynyń kezekti 25-shi sessııasy ótti. Onda depýtattar turǵyndar úshin turmystyq qatty qaldyqtardy jınaýǵa, tasymaldaýǵa, suryptaýǵa jáne kómýge arnalǵan tarıfterdi bekitti.
«Abattandyrylǵan jer úıde nemese páterde turatyn azamat úshin qoqys shyǵarý tarıfi – 420 teńgeni quraıdy. Al abattandyrylmaǵan úı turǵyny aı saıyn – 553,22 teńge tóleıdi», - delingen qala ákimdigi taratqan málimette.
Sondaı-aq máslıhat depýtattary jol qozǵalysy qaýipsizdigin qamtamasyz etý týraly sóz qozǵady.
Jyl basynan beri shaharda 64 jol-kólik oqıǵasy tirkelgen. Saldarynan 90 adam jaraqat alyp, 4 azamat kóz jumdy. Kámeletke tolmaǵandardyń qatysýymen 14 jol apaty bolǵan.
«Jol qozǵalysy erejelerin buzǵany úshin 16 145 adam jaýapqa tartyldy. Onyń ishinde kólikti mas kúıde basqarǵany úshin 168 júrgizýshi, rýlde otyryp telefon paıdalanǵany úshin 987 adam aıyppul arqalady. Semeı qalasy polıtsııa basqarmasynyń jedel basqarý ortalyǵy beınebaqylaý kameralary boıynsha 4 791 ákimshilik quqyq buzýshylyqty anyqtady», - delingen aqparatta.