Semeıde qala kúni merekelenip jatyr
Abaı oblysy ákimdigi baspasóz qyzmetiniń málimetine súıensek, mereke tuńǵysh ret Abaı marafonymen bastaldy. Qatysýshylar qala ishinde 3, 5, 10 shaqyrymdyq qashyqtyqta júgirdi. Márege jetken ár sportshy estelik medal jáne fýtbolkamen marapattaldy.
Erler men áıelder arasyndaǵy árbir eń úzdik nátıje kórsetken úsh qatysýshy júldeger medalin aldy. Atap aıtqanda:
3 km – Saıahat Muhtarov (23.23)
3 km – Svetlana Dımovskıh (24.12)
5 km – Meıir Mársebaı (27.16)
5 km – Anastasııa Rýbahına (31.14)
10 km – Amet Manat (38.37)
10 km – Karına Ádilhanova (55.09) márege jetti.
Jeńimpazdarǵa medaldardy oblys ákimi Nurlan Uranhaev pen orynbasarlary tabys etti.
Abaı marafonynan keıin qala kúni ortalyq alańdaǵy merekelik kontsertpen jalǵasty. Murajaılar men kitaphanalardyń qala tarıhynan syr shertetin kórmeleri usynyldy. Jaǵalaýda qala mektepteri men balabaqsha tárbıelenýshileriniń qolóner týyndylary kórmesi, ıntellektýaldy oıyndar uıymdastyryldy.
«Severnyı» saýda-logıstıkalyq ortalyǵynda aýylsharýashylyǵy jármeńkesi ótti. Sonymen qatar, saǵat 9-dan bastap túske deıin jaǵalaýda túrli baıqaý, shahmat týrnıri, fleshmobtar uıymdastyryldy. Kúni boıy qaladaǵy barlyq murajaıda qala tarıhyna baılanysty ekspozıtsııa ashyq boldy. Nevzorovtar otbasy murajaıynda, Abaı murajaıynda, Dostoevskııdiń tarıhı-ólketaný murajaıynda ashyq esik kúni ótkizildi», - delingen aqparatta.
Saǵat 11-den keshke deıin ortalyq alańda merekelik kontsert boldy. Sondaı-aq, Ertis jaǵalaýynda, Arbatta jáne Abaı alańynda da kontserttik baǵdarlamalar qoıyldy.
Saǵat 13:00-de Ertis jaǵalaýynda talantty jastardyń «Jastar fest» atty festıvali ótkizildi. Saǵat 18:00-de ortalyq alańda ár sala boıynsha «Úzdik» nomınatsııasynyń jeńimpazdary marapattaldy.
Endi saǵat 19:00-de Á. Qashaýbaev atyndaǵy fılarmonııa jáne qalalyq mádenıet úıi ujymdarynyń kontserti bastalady. Semeılikter úshin bul keshte Dastan Orazbekov jáne Kalifarniya án shyrqaıdy. Saǵat 22:00-de qala kúni merekelik otshashýmen aıaqtalady.