Semeıde izdeýde júrgen qylmysker ustaldy
ShQO polıtsııa departamenti baspasóz qyzmetiniń málimetine súıensek, tártip saqshylary úı tonaǵany úshin Semeı qalalyq sotymen izdestirilip jatqan 34 jastaǵy er adamdy ustady.
«Qylmysker bir jyl buryn jer úılerdiń birine tereze arqyly kirip, odan jarty mıllıon teńge men altyn buıymdardy urlap ketken. Biraq sol kezde ony tabý múmkin bolmady. Búginde ol ýaqytsha ustaý ızolıatoryna qamaýǵa alynǵan», - delingen aqparatta.
Budan bólek, Ulan aýdanynda 38 jastaǵy er adam probatsııa qyzmetinen jasyrynyp júrgen.
Ol 2019 jyldyń 6 qańtarynda tańǵy ýaqytta tanysymen birge óskemendik azamattyń páter qulpyn buzyp kirgen. Páter ıesin pyshaqpen qorqytyp, úıdi tonap ketti.
«Sot úkimi boıynsha ol shartty túrde bas bostandyǵynan aıyrylyp, probatsııa qyzmetiniń esebine alynǵan. Alaıda biraz ýaqyttan keıin baqylaýdan jasyrynyp, qashyp júrdi. Polıtsııa qyzmetkerleri sottalǵannyń qaıda ekenin anyqtap, qolǵa túsirdi. Qazirgi ýaqytta oǵan qatysty sot sheshimi kútilýde», - delingen habarlamada.
Esterińizge sala ketsek, osyǵan deıin Semeı turǵynynyń úıinen esirtkiniń asa iri partııasy tabylǵanyn habarlaǵan edik.