Semeıde ıdeologııalyq turǵyda eskirgen 50 kósheniń ataýy ózgeredi

SEMEI. QazAqparat – Semeı qalasynda ıdeologııalyq turǵyda eskirgen 50-ge jýyq kóshe ataýy ózgertilmek, dep habarlaıdy QazAqparat tilshisi.

Qala ákiminiń orynbasary Jánibek Muqataevtyń tóraǵalyǵymen Semeıde onomastıkalyq nysandardyń tarıhı dástúrli ataýlaryn qalpyna keltirý týraly usynystardy zerdeleý jáne qaraý jónindegi jumys tobynyń kezekti otyrysy ótti.

«Qazir ıdeologııalyq turǵyda eskirgen jáne mán-maǵynasy joq kóshe ataýlaryn kezeń-kezeńimen qaıta ataý mindeti qoıylyp otyr. Otyrystyń kún tártibinde osyndaı 50-ge jýyq kósheniń ataýyn ózgertý týraly usynystar qaraldy. Jumys barysynda qaıta atalatyn kóshelerge esimi el tarıhynda qalǵan, Semeı óńiriniń tarıh, mádenıet, ádebıet, sport syndy salalaryna eńbegi sińgen tulǵalardyń, Alash qaıratkerleriniń esimderi beriledi», - dep habarlady qala ákimdiginen.

Sondaı-aq jıyn barysynda mán-maǵynasy joq qysqa kóshelerge beıtarap jer-sý attaryn berý máselesi talqylandy. Esimderdi usyný kezinde respýblıkalyq onomastıkalyq komıssııasy bekitken tarıhı tulǵalar tizimi qatań basshylyqqa alyndy.

Odan ári osy usynystar qalalyq máslıhattyń turaqty komıssııalarynda ótetin kópshilik tyńdaýlarda qaralyp, oblystyq onomastıkalyq komıssııaǵa joldanady. Sońǵy sheshim respýblıkalyq onomastıkalyq komıssııasynyń qorytyndysy negizinde QR Úkimetiniń qaýlysymen shyǵarylady.