Semeıde esirtki saýdalaǵan er adamnyń úıinen 10 keli marıhýana tabyldy
ShQO Polıtsııa departamenti baspasóz qyzmetiniń málimetine súıensek, Semeı qalalyq PB Esirtki qylmysyna qarsy is-qımyl bólimi men UQK Shyǵys Qazaqstan oblystyq departamentni birlesip jedel-izdestirý sharalaryn júrgizdi.
«Sonyń nátıjesinde, shahar aýmaǵynda esirtkiniń zańsyz aınalymyna qatysy bar degen kúdikpen Aıagóz qalasynyń 44 jastaǵy turǵyny ustaldy. Páterin tintý kezinde perdeniń artyna jasyrylǵan jasyl tústi sómke tabyldy. Onyń ishinde erekshe ıisi bar ósimdik tektes zat salynǵan polıetılen paket bolǵan», - delingen aqparatta.
Saraptama qorytyndysyna sáıkes, tárkilengen zat keptirilgen marıhýana bolyp shyqty. Onyń jalpy salmaǵy shamamen 10 kelini qurady.
Atalǵan fakti boıynsha QR QK-niń 297-baby 3-bóligimen (Esirtkini, psıhotroptyq zattardy jáne sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý) sotqa deıingi tergeý amaldary bastaldy. Er adam 10-nan 15 jylǵa deıingi merzimge bas bostandyǵynan aıyrylýy múmkin.