Semeıde Ertis ózeninde jarylys jasaldy
13 naýryzda muz keptelýiniń aldyn alý maqsatynda Ertis ózeniniń Mırnyı kenti Ippodrom aýdanyndaǵy tusynda jarylys jumystary júrgizildi. Barlyǵy 260 zarıad qoldanyldy. Jarylǵysh zattardyń jalpy salmaǵy – 650 keli.
«Jarylys kezinde qaýipsizdikti qamtamasyz etý úshin Abaı oblystyq Tótenshe jaǵdaılar departamentiniń qyzmetkerleri, jedel járdem dárigerleri, polıtseıler, «Kazseldenqorǵaý» mekemesiniń óńirlik fılıaly men Sý resýrstaryn paıdalaný men qorǵaýdy retteý boıynsha Ertis basseındik ınspektsııasynyń mamandary qatysty. Bul sharalar jyl saıyn kún jylyp, qar erı bastaǵanda ótkiziledi. Osynyń arqasynda ózen jaǵalaýynda ornalasqan eldi mekender sý tasqynynan qorǵalady», - dep habarlady qala ákimdiginen.
Ertis ózenindegi jarylys jumystarynan jalpy aýdany 9340 tekshe metr muz usaqtaldy. Qazirgi ýaqytta ózendegi sý deńgeıi – 298 sm. Al shekti deńgeı 450 sm quraıdy.