Semeıde eki monsha órtendi
ShQO Tótenshe jaǵdaılar departamenti baspasóz qyzmetiniń málimetine súıensek, 22 mamyrda túngi saǵat 02:00-de qutqarýshylarǵa Krasın kóshesindegi monshanyń shatyry janyp jatqany týraly habar tústi. Órt sóndirýshiler oqıǵa ornyna shuǵyl kelip jetken.
«Olardyń úılesimdi is-qımyldarynyń arqasynda tilsiz jaý aýyzdyqtalyp, órttiń odan ary taralýyna jol berilmedi. Qyzyl jalynmen kúreske jeke quramnan 35 adam men 10 tehnıka jumyldyrylǵan. Aldyn ala málimet boıynsha órttiń shyǵýyna – peshti ornatý jáne paıdalaný kezinde órt qaýipsizdigi talaptarynyń saqtalmaýy jáne otty paıdalaný kezindegi abaısyzdyq sebep bolýy múmkin», - dep habarlady vedomstvo ókilderi.
Budan bólek, qalada taǵy bir monsha men saıajaı otqa oranǵan. Órttiń jalpy aýdany 68 sharshy metrge jetti. Qutqarýshylar jalyn sharpyǵan aýmaqtan 27 lıtrlik gaz ballonyn taýyp, dereý syrtqa shyǵardy. Tilsiz jaýdy óshirýge jeke quramnan 20 adam men 6 tehnıka jumyldyryldy. Eki jaǵdaıda da qaza tapqandar men zardap shekkender joq.