Semeıde dıýker máselesi sheshildi

SEMEI. QazAqparat - Semeıde kárizdik dıýkerdi qalpyna keltirý máselesi sheshildi. Bul týraly qala ákimi Ermak Sálimov turǵyndarǵa esep berý jıynynda aıtty, dep habarlaıdy QazAqparat Semeı aqparattyq ortalyǵyna silteme jasap.

Kezdesý barysynda qala basshysy Ertis ózeni arqyly ótetin kanalızatsııalyq dıýker máselesi sheshilgenin jetkizdi. Apatty jaǵdaıda bolǵan dıýkerdi qaıta qurý jumystaryna 400 mln teńge qarjy bólingen.
«Eýropalyq Qaıta Qurý jáne damý bankimen» yntymaqtastyq sheńberinde qalada sýmen jabdyqtaý jáne sý burý júıesin jańǵyrtý jónindegi jobalardy iske asyrý bastaldy.
Aldaǵy jyly kóshelerdi jaryqtandyrý jáne jylýmen qamtý jobalary óz bastaýyn almaq. Olardy iske asyrý 26 kılometrdi jylý, 12 kılometrdi sý qubyry, 5 kılometrden astam káriz jelilerin, sondaı-aq 7 296 kóshe jaryǵyn aýystyrýǵa múmkindik beredi.
Sonymen qatar, Aqsaı kentinde sý bógetin qaıta qurý, sýmen jabdyqtaý jelilerin jáne Ushaqtar shaǵyn aýdanynda káriz kollektoryn salý josparlanýda.
«Kóp jyldar boıy Komsomolskıı jáne Ushaqtar kentterinde ortalyq sý qubyry men sapaly elektr jelileri bolmaǵan. Aǵymdaǵy jyly bul másele sheshilip, atalǵan kentterde elektr jáne sýmen jabdyqtaý qurylysy bastalady. Kommýnaldyq jáne qurylys salasyndaǵy jobalardy júzege asyrý oblys basshysy Danıal Ahmetovtyń tikeleı qoldaýynyń arqasynda júzege asyrylýda»,- dedi Ermak Sálimov.