Semeıde dosymen bástesken 22 jastaǵy jigit kópirden sekirip ketti

<p>SEMEI. KAZINFORM &ndash; Semeı qalasynda dosymen bástesken jigit kópirden sýǵa sekirdi.</p>

Abaı oblystyq polıtsııa departamenti baspasóz qyzmetiniń málimetine súıensek, oqıǵa 10 qazan kúni tańǵy saǵat 5:30 shamasynda bolǵan. Dosymen bástesken jigit qaladaǵy eski kópirden Ertis ózenine sekirgen. Abyroı bolǵanda, oǵan eshqandaı zaqym kelmeı, jańa kópirge qaraı júzip ketken.

«Sol jerge polıtsııa qyzmetkerleri kelip jetti. Óz betimen jaǵaǵa júzip jetken 22 jastaǵy qala turǵyny medıtsınalyq kómekke muqtaj bolmady», - delingen aqparatta.

Er adam ortalyq polıtsııa bólimshesine jetkizildi. Tártip saqshylary oǵan profılaktıkalyq maqsatta túsindirý jumystaryn júrgizdi.

Osy rette, polıtsııa departamenti mundaı áreketterdiń aýyr saldarǵa ákelýi múmkin ekenin jáne tek sol adamnyń ózine ǵana emes, aınalasyndaǵylardyń da ómirine qaýip tóndiretinin eskertti.

Eske salsaq, osyǵan deıin ShQO-da oqýshy qyzdy qorlaǵandarǵa qatysty qylmystyq is qozǵalǵany habarlanǵan.