Semeıde bıyl qaı kóshe joldary jóndeledi

SEMEI. QazAqparat – Semeıde bıyl qalalyq bıýdjetten Áýezov dańǵyly men oǵan irgeles kóshe joldaryn ortasha jóndeýge 1 mıllıard teńge bólingen, dep habarlaıdy QazAqparat tilshisi.

Shahardaǵy aınalma joldan Et kombınaty aýdanyndaǵy Baıǵojına kóshesine deıingi jol jóndelmek.

Sondaı-aq Áýezov dańǵylyna irgeles Tarbaǵataı, Irtyshskaıa, Krestıanskaıa jáne 410 kvartal kósheleriniń joldaryna ortasha jóndeý júrgizý josparlanyp otyr.

Konkýrs qorytyndysy boıynsha merdiger «OblShyǵysJol» JShS bolsa, qosalqy merdiger - «Fırma Azııa» JShS.

Áýezov dańǵyly boıynsha jumystardy aıaqtaý 1 qazanǵa josparlanyp otyr.

«Áýezov qıylysynda kólik júrgizýshileriniń jol apatyna túsý qaýpi joǵary edi. Qazirgi ýaqytta ol olqylyqtyń orny tolyqtyryldy. Birinshi rette, aınalma joldan Selevın kóshesine deıin, odan ári Selevınnen et kombınatyna deıin qamtylatyn bolady. Qajetti tehnıka jumyldyrylǵan. Ortasha jóndeýge – 3 jyl, kúrdeli jóndeýge – 5 jyl kepildik bar», – deıdi qalalyq jolaýshylar kóligi jáne avtomobıl joldary bóliminiń bas mamany Dınara Kákenova.

Qalanyń basqa aýmaqtarynda da jol jóndeý jalǵasýda. Búginde Elemesov kóshesinde jóndeý jumystary aıaqtalýǵa jaqyn.

Altaı, Sevastopol, Sınıtsın, Stalskıı jáne Grıaznov kóshelerinde ortasha jóndeý jumystary aıaqtaldy.

Sonymen qatar temirjolshylar kentine deıingi jolǵa ortasha jóndeý júrgizilgen.