Semeıde «Bir týdyń astynda» avtosherýi ótti

SEMEI. QazAqparat – Semeı qalasynda Respýblıka kúnine oraı «Bir týdyń astynda» atty avtosherý ótti, dep habarlaıdy QazAqparat tilshisi.

Patrıottyq sharaǵa 50 avtokólik qatysyp, «Abaı» áýejaıynan «Arena» mádenı-sporttyq keshenine deıin júrip ótti.

Semeı qalasy ákimdigi baspasóz qyzmetiniń málimetine súıensek, «Bir týdyń astynda» avtosherýin «Amanat» partııasynyń «Jastar rýhy» jastar qanaty uıymdastyrǵan.

«Eń aldymen barsha qazaqstandyqtardy egemendi elimizdiń basty merekesine aınalǵan – Respýblıka kúnimen quttyqtaımyn! Bul mereke jastardy otansúıgishtikke tárbıelep, boılarynda patrıottyq sezim qalyptastyrady. Osy oraıda Semeı qalasynyń jastary 40 «Toyota Estima» kóligimen avtosherý uıymdastyrdy. Shara barysynda elimizdiń kók baıraǵy jelbiredi.

Temir tulparlar eń áýeli áýejaıdan qalanyń ortalyq kósheleri arqyly júrdi. Sodan soń «Qaraǵaıly» yqsham aýdanyna ótip, «Arena» mádenı-sporttyq keshenine toqtady», - deıdi jastar qanatynyń Abaı oblystyq fılıalynyń tóraǵasy Almas Aıtmuqash.

Onyń aıtýynsha, jastar qanatynyń belsendileri osy ýaqytqa deıin birneshe patrıottyq aktsııa uıymdastyrǵan. Olardyń qatarynda «Dombyra Party», «Meniń týym – meniń Qazaqstanym», «Biz birgemiz!» jáne taǵy basqa sharalar bar.