Semeıde arendalyq turǵyn úıge qujattardy qabyldaý bastaldy

ÓSKEMEN. QazAqparat - Semeıde 5 qańtardan bastap, «Óńirlerdi damytýdyń 2020 jylǵa deıingi baǵdarlamasy» negizinde «Qazaqstan ıpotekalyq kompanııasy» AQ arqyly júzege asyrylatyn arendalyq turǵyn úılerge qujattardy qabyldaý bastaldy, dep habarlaıdy «QazAqparat» HAA tilshisi.

Qalalyq turǵyn úı-kommýnaldyq sharýashylyǵy (TKSh) bóliminiń habarlaýynsha, jalǵa beriletin baspanaǵa ótinishter jeti sanat boıynsha qabyldanady - tolyq emes jáne kópbalaly otbasylar, ata-ana qamqorlyǵynsyz qalǵan jáne jetim balalar, 1-2 top múgedekteri, múgedek bala tárbıelep otyrǵan otbasylar, memlekettik jáne bıýdjettik mekeme qyzmetkerleri, oralmandar, áskerı qyzmetshiler jáne t.b.

Baǵdarlamaǵa qatysýshylar tizimi toptar boıynsha jasaqtalady, tolyq málimetti Semeı ákimdiginiń TKSh bóliminen bilýge bolady. Osy jerden qajetti qujattardyń tizimin de alýǵa bolady.

Turǵyn úı Glınka kóshesinde ornalasqan. Satyp alý quqyǵymen jalǵa alý quny 1 sharshy metri úshin shamamen 924 teńgeni quraıdy. Jalǵa alý merzimi - 20 jyl.  

Onymen bir mezgilde, ShQO energetıka jáne TKSh basqarmasynan málim etkendeı, memlekettik turǵyn úı qorynan baspana alýǵa oblys boıynsha 27 685 adam kezekte tur. Bular - joǵaryda atalǵan sanatqa (múgedekter, jetim balalar, áleýmettik álsiz toptar, apatty úı turǵyndary, memlekettik jáne bıýdjettik qyzmetkerler t.b.) jatatyn shyǵysqazaqstandyqtar.