Semeıde Álıhan Bókeıhannyń eskertkishine gúl shoqtary qoıyldy

SEMEI. QazAqparat - Semeılikter saıası qýǵyn-súrgin jáne asharshylyq qurbandaryn eske aldy. Eske alý kúnine oraı qala turǵyndary «Alash» qozǵalysynyń kóshbasshysy, kórnekti qoǵam qaıratkeri Álıhan Bókeıhannyń eskertkishine jınalyp, memorıalǵa gúl shoqtaryn qoıdy. Eske alý sharasyna Abaı oblysy ákiminiń orynbasary Shalqar Baıbekov, Semeı qalasynyń ákimi Nurbol Nursaǵatov pen qoǵam belsendileri qatysty, dep habarlaıdy QazAqparat.

«Barsha adamzat úshin damýdyń, azattyqtyń dáýiri bolǵan HH ǵasyrdy Qazaq eli bodandyqtyń buǵaýynda qarsy alǵany – aqıqat. Osy bir alasapyran zamanda bútindeı bir ulttyń sengeni - tek oqyǵan azamattar bolatyn. Eldiń egemendigin qalpyna keltirip, ozyq, órkenıetti elge aınaldyrýdy kózdegen Alash qozǵalysy dál osy zamanda «qarańǵy qazaq kógine kún bolyp órmelep shyqty». Ulttyń uly tulǵalary Álıhan Bókeıhan, Ahmet Baıtursynuly, Mirjaqyp Dýlatovtar syn saǵatta aıanbaı qyzmet etip, qazaqtyń ar-namysyn óz janynan bıik qoıdy. Azattyqty ańsady... Alaıda, «qyzyl terrordyń» kesirinen olar júz myńnan astam jazyqsyz jazaǵa ilingender «kóshin» bastap, «halyq jaýyn» anyqtaý saıasatynyń qurbany boldy, «qaýipti element» bolyp atyldy. Búginde Alash armany aqıqatqa aınaldy. «Alash qonǵan aq boz úı» atanyp, Alashqa pana bolǵan qart Semeı de óz bıigine shyqty. Abaı oblysy quryldy. Bunyń ózi tarıhty ardaqtap, ádildikke jol bergen Memleket basshysy Qasym-Jomart Toqaevtyń salıqaly saıasatynyń negizinde múmkin bolyp otyrǵanyn erekshe atap ótý oryndy. Zamanalar aýysyp, qara jer qoınyna jasyrǵanymen, azattyq jolynda qurban bolǵandar esh umytylmaıdy. Sebebi, asyl azamatyn ardaqtaıtyn urpaq bar», - dep atap ótti Abaı oblysy ákiminiń orynbasary Shalqar Baıbekov.

31 mamyr – Saıası qýǵyn súrgin jáne asharshylyq qurbandaryn eske alý kúninde Shalqar Baıbekov zamannyń zańǵar tulǵalary jastardyń jadynda máńgi saqtalyp, babalar amanatyna adal urpaqtyń ómir báıgesinde, asyqtary alshysynan túse bersin degen nıetin bildirdi.

Aıta keteıik, buǵan deıin habarlanǵandaı, búgin qazaq halqynyń damý áleýetin ondaǵan jyldarǵa kesheýildetip, adamı kapıtalyn orny tolmas shyǵynǵa ushyratqan HH ǵasyrdaǵy saıası qýǵyn súrgin jáne asharshylyq qurbandaryn eske alý kúni. Osyǵan baılanysty elimizdiń túkpir-túkpirinde eske alý sharalary ótip jatyr. Prezıdent atap ótkendeı, azaly kúnderden sabaq alyp, mundaı náýbettiń keleshekte qaıtalanýyna jol bermeý – barshamyzǵa ortaq paryz.