Semeıde áleýmettik baǵada satylatyn kókónister 3 jarym myń tonnaǵa artady
Qala ákimi Baqytjan Baıahmetov kóktemgi egis jumystarynyń barysymen tanysty.
«Búginde Prırechnyı aýyldyq okrýgindegi eń iri aýyl sharýashylyǵy taýaryn óndirýshi – «Agrofırma Prırechnoe» JShS. Bıyl kompanııa egis alqaptarynyń qurylymyn birneshe esege keńeıtti. Máselen, ótken jyly dándi daqyldar 309 gektar jerge egilgen bolsa, bıyl olardyń aýdany 162% ósip, 500 gektardy qurady. Al kartop egý 150 % ósip, 309 gektarǵa jetti. Qyryqqabat, sábiz jáne jem-shóp daqyldary da kóbirek egildi», - dedi ol.
Onyń aıtýynsha, kompanııa shahar qoımalaryna kókónisterdi tómen baǵada jetkizýde. Osy jyly áleýmettik baǵada satylatyn kókónisterdi 3 jarym myń tonnaǵa artyrý kózdelip otyr.
«Semeıde qajetti daqyldardyń egistigi keńeıýde. Azyq-túlik qaýipsizdigi úshin kókónis daqyldarynyń egis alqaptaryn arttyrý mańyzdy. Qazirgi tańda ósirilgen kókónister ishki qajettiliktiń 50-70%-yn qamtyp otyr. Sondyqtan sharýa qojalyqtarynyń ıelerine aldaǵy ýaqytta júıeli túrde qoldaý kórsetý qajet. Birinshi kezekte, ınfraqurylymdy retke keltirý mańyzdy. Arnaıy memlekettik baǵdarlamalar arqyly ınvestorlardy tartyp, aýyldyq óndiristik kooperatıvterge qoldaý kórsetý josparlanýda. Byltyr qaladaǵy sharýa qojalyqtarynyń ıelerine 2 mıllıard teńgeden astam somaǵa qaıtarymsyz sýbsıdııalar berildi. Bıyl memleket tek aqshamen ǵana emes, taǵy basqa da qajetti qoldaý kórsetýdi jalǵastyrady», - dedi Baqytjan Baıahmetov.
Esterińizge sala ketsek, osyǵan deıin Semeıde aýyl sharýashylyǵy salasynda 8 ınvestıtsııalyq joba júzege asyrylyp jatqanyn habarlaǵan edik.