Semeıde aqaý shyqqan JEO-da kómirdi qolmen salyp shyqqan áskerıler marapattaldy
15 jeltoqsanda saǵat 00:34-te Semeıdegi №1 JEO-da uzyndyǵy 6 metr alańda transporter lentasy men elektr kabelderi janǵan bolatyn. Saǵat 1.36-da órt tolyǵymen sóndirildi. Alaıda órt saldarynan kómir berý júıesiniń jumysy toqtatyldy.
Sol kezde TJM 68303 áskerı bólimi men QM 28738 áskerı bóliminiń jeke quramy jalpy kólemi 34 tonnaǵa jýyq kómirdi qazandyq agregatyna úzdiksiz qolmen salyp otyrǵan edi.
Semeı qalasynyń ákimi Nurbol Nursaǵatov sarbazdarmen kezdesip, óz rızashylyǵyn bildirip, Gramotalar tabystady.
«Osydan birneshe kún buryn JEO-da kómir berý júıesi isten shyqqan kezde úılerge jylý berýdi toqtatpaý úshin qosymsha kúsh retinde áskerı gornızonynyń sarbazdary jumyldyryp, kómirdi qolmen tasymaldady. Jylý ortalyǵyndaǵy áskerılerdiń eren eńbegine bárimiz kýá boldyq. Abyroı bolǵanda, jedel áreketterdiń arqasynda qalaǵa jylý úzdiksiz berildi. Qalamyzdy apattan saqtap qalýǵa úlken úlesterin qosqandary úshin sarbazdarǵa óz alǵysymdy bildiremin!», - dedi shahar basshysy.