Semeıde Abaıdyń mereıtoıyna oraı jańa spektakl qoıylmaq
Bul qoıylym uly aqynnyń ómir joly men shyǵarmashylyǵy týraly syr shertedi. Daıyndyǵy tórt aıǵa sozylǵan spektaklde 13 akter óner kórsetedi. Al sahna dekoratsııasyna elordadan mamandar shaqyrylǵan. Rejısser Gaýhar Adaıdyń aıtýynsha, akterlerge qoıylǵan basty talap - keıipkerlerdiń syrt beınesin aınytpaı berý emes, óz sheberlikteri arqyly olardyń minez-qulqyn, jan dúnıesin kórermenge shynaıy jetkize bilý.
«Sahnadaǵy kórinister arqyly aýdıtorııany tereń oıǵa jetelegimiz keledi. Abaı beınesin somdaıtyn akterde kózimiz úırengen aqyn beınesindegi saqal, basqa da bet-álpet uqsastyǵy bolmaıdy», - deıdi rejısser.
Abaı beınesin somdaıtyn Erkebulan Nuǵymanovtyń oıynsha, hákimniń rólin oınaý zor qurmet.
«Kez kelgen akter ózine berilgen keıipkerdi shynaıy beıneleýge tyrysady. Al Abaı beınesin somdaý - akter úshin naǵyz baqyt ári úlken jaýapkershilik. Kórermenderdiń oıynan shyǵý úshin barynsha tyrysýdamyz»,- deıdi ol.
Aıta keteıik, spektakldiń tusaýkeseri aqpannyń 21-22 kúnderi ótedi.